الأحد، 17 يناير 2010

الجزء الأول من هو خالد دياب؟ سيناريست شاب ... كتبت فيلم الف مبروك لأحمد حلمي مع اخي محمد دياب الذي له كبير الفضل علي باشراكه لي في هذاالفيلم وكتبت فيلم احمد حلمي الجديد جوازسفر مصري أو مصر هي اوضتي حسب موافقة الرقابة !! والفيلم يتم تصويره الان و يتحدث عن الهوية المصرية واتمني ان اعرف اي الاسمين تفضلون ؟؟ مش عايز اعمل فيها نجم بس عايز احكي عن طفولتي هادي جدا خجول جدا في سنواتي الاولي ...اخشي التعامل مع الناس...شاطر جدا جدا لغايه سنه خامسه ابتدائي وبعدين مستوي الدراسي قل لضعف مدرسي المرحلة الاعداديه في مدرستي لكني استمررت في كمتفوق بالذكاء وليس بالمذاكره..وبدات ازوغ من المدرسه واروح السينما..طبعا دي مش دعوه للتزويغ انما حقائق حدثت وبالرغم من مشاهدتي للكثير من الافلام نفعني الا ان التزويغ اكيد كان غلط. هواياتي هوايتي في هذه الفترة كانت قرايه روايات رجل المستحيل وملف المستقبل وطبعا كنت اضع الروايات داخل كتاب المدرسه ،وامثل االمذاكره وعندما تاتي امي اقلب الصفحه وامثل مذاكره الكيميا مثلا وطبعا ياما امتسكت واتعاقبت ومستوايا تدني في الدراسه والحاجه الوحيده اللي كنت اشطر واحد فيها في المدرسه كانت العربي (النحو والتعبير)...وطبعا بحب البنج بونج جدا واكيد كرة القدم زي كل الولاد. الثانوية العامة وصلت للثانويه العامه يوم يهان المر او يهان وشديت حيلي وذاكرت كويس وكنت عايز اخش كليه هندسه ليه معرفش يمكن عشان كليه ...من كليات القمه كما يفكر الجميع...المهم جبت مجموع اقل من هندسه بدرجتين ويومها فعلا عرفت يعني ايه اراده ربنا..يعني مثلا لوكنت سطرت كويس في امتحان الميكانيكا كنت جبت الدرجتين دول لكن ربنا مش عايزني اخش كليه هندسه...طب ايه الكليات المتاحه؟؟اه في كليه فنون جميله عماره وانا كنت ناجح في امتحان العماره فقررت دخول الكليه باسلوب الطفاسه المصري الشهير وهو دخول اعلي كليه جابه مجموعك...طبعا كله عارفه.. زي اللي بيخش طب عشان مستخسر المجموع فيعيش طول عمره في شغل مبيحبوش ودخلت الكليه وانتظمت اول شهر لكني اصطدمت بالنظام التعليم الحكومي السئ خصوصا في كليه الفنون الجميله حيث يظن الدكاتره فيها انهم الهه تمشي علي الارض حيث ان كل شي يخضع للفن وهم الفنانون.. بالاضافة للخطئ الكبير في الكليات وهو وضع الاساتذه الاقل مستوي لتعليم الطلبه حديثي القدوم...وبما اننا في كليه تعتمد علي الفن فكون الدكتور يدرس لطلبة السنه الاولي هي اهانه لاتغتفر له وكأنه اعتراف من حوله بأنه ليس فنانا... فكان يخرج عقدة عدم اعتراف المجتمع بفنه علي الطلبة بالسخريه من اعمالهم امام بعضهم الاخر والضحك اجباري بالطبع والا ستكون ممن لا يقدرون فن الدكتور المريض الذي يعطيك الدرجات علي كثرة ضحكك علي ايفهاته السخيفة....(معلش زودت شويه مع الدكاتره اصلي مبقوق منهم). اما بالنسبه للمعيدين فكانو يشرحون للبنات فقط او جروبس الولاد اللي بتعرف بنات ولم اكن انا هذا الشخص...فانا لي رأيي الخاص في حدود العلاقه بين الاولاد مع البنات من صغري... وللصدق كان هناك معيد يشرح للولاد حتي إن اتو له من غير بنات خالص ويستحق ذكر اسمه ياسر البلتاجي ....وبالطبع لم احب الكليه بل علي العكس كرهتهاوتقريبا اجمالي المحاضرات التي حضرتها كانت عشره محاضرات طوال خمسه سنوات بعد الشهر الانتظام الذي ذكرته. امريكا في صيف السنة الثانية من الكلية اتي اخي بفكرة السفر للخارج لامريكا وتقضية الصيف هناك وكانت هناك مشكلتين...الاولي اقناع امي بالتخلي عن خوفها والثانيه اقناع ابي بدفع مصاريف الرحلة...في باديء الامر اعتقد ابي وامي انها فكره عابره لكني واخي اثبتنا انها ليست كذلك بعد تقدمنا للسفارة وحصولنا علي الفيزا ...ثم اتجهنا لامي لتسمح لنا بالسفر وكان عمري سبعة عشر عاما ورفضت في بادئ الامر لكني واخي كنا مميزين في الزن... فاقتنعت بعد عناء وبكاء من الخوف من الرحلة...ثم جاء دور أبي الذي سيلعب دورالممول.. والدي يعمل طبيب جراح وكان شغله الشاغل ان نستغل وقت الصيف في شئ مفيد فكان سؤاله المباشر...ما هي الاستفادة من رحلة الفسحة تلك ؟؟

هناك 6 تعليقات:

  1. في قناعتي الخاصة أن الدور الذي يلعبه الأباء هو المشكل الأساسي لخصائص شخصية الأبناء و إتجاهاتهم المستقبليه, فهل لك أن تسلط بعض الضوء على هذا الدور و كيف ساهمت طريقة التنشئة التي تم إنتهاجها معك في تشكيل شخصيتكم حتى تعم الفائدة
    الله يعطيكم ألف عافية

    ردحذف
  2. أولاً: البداية في الكلام عن خالد -فيها تسرع- كعادتك في الحياة، كانت عاوزه تمهل شوية إلا إذا كنت متردد في وصفك بالنجم، وده فاكر نفسه مين ،وبتاع، والكلام اللي ممكن يتقال في الظروف دي :)

    ثانياً: الوصف التفصيلي لحال الفنانين وفقت فيه ، وبمكاشفه جريئة.
    ثالثاً: انا حبيت أبوك د/ عبد الحميد، من أول ما سمعت (بص ف وشوش الناس كله وراه حكايه.... المشكلة م البداية التفتيش ف النوايا....) اللي شارك في كتابتها حبيبي محمد دياب :)
    الله يبارك في والديك، دنيا وآخره.

    ردحذف
  3. السلام عليكم ورحمة الله
    بجد كلامك بيوصل القلب قوى قوى يا خالد
    ويدخل القلب كدة
    فعلا اللى يطلع من القلب بيدخل القلب
    واللى بيطلع من اللسان ميعديش على الودان
    ربنا يكرمك يارب فى مجددون وفى حياتك العملية يارب
    وبجد يا خالد انا كنت بدور على محمداو عليك من زمان وأول ما لاقيتك فى مجدون قولت سبحان الله
    وكمان على الفيس بوك دة اية الكرم دة
    تحياتى ليك يا خالد وبالتوفيق بإذن الله تعالى

    ردحذف
  4. ازيك يا استاذ / خالد بجد انا استمتعت جدا ب احداث حياتك ومن قبلها اتشرفت بمعرفتك واكتشفت ان مش الفنان محمد بس اللى حكاية ده كمان ليه اخ حكاية تانية بس هو عمره ما كلمنى عن حضرتك هو حبيبى واخ ووصلة امل بينى وما بين موهبتى وحلمى العنيد على فكرة احداث حياتك مقاربة جدا لاحداث حياتى بس لحد الجيش ده مع بعض الاختلافات طبعا لانى زى محمد خريج تجارة وطبعا مكنش ليا نصيب فى موضوع امريكا ده مسمعتش عنه الا من صديق ليا فى الجيش كان زيكم كده برضه المهم يا باشا ربنا يوفقك يارب وفيلمك الجاى فى انتظاره وانتظر منى بعده نقد تفصيلى وربنا معاك

    ردحذف
  5. السلام عليكم
    الف مبروك للمجدد الاول /خالد دياب
    انا تابعتكم من اول حلقة بجد كنتم مبدعين
    والحمد لله ربنا وفقك وفزت وان شاء الله ربنا هيوفقك وتحقق مشروعك
    بتمنالك حياة سعيدة وموفقة

    ردحذف
  6. ربنا يوفقك بجد انت موهوب و مجتهد الاثنين سويا ماشاء الله!
    اما بالنسبة لاسم الفيلم فطبعا مصر هي اوضتي يشد أكتر ..وربنا يوفقك

    ردحذف